Gazeta JEHONA
				Vezët e kuqe
			Tradita e lyerjes së vezëve në kohën e Pashkës është e vjetër dhe e ngulitur thellë në shumë familje shqiptare. Madje edhe në kohën e shtetit ateist kur feja ishte e ndaluar, shumë njerëz përsëri i lyenin vezët të kuqe për Pashkën. Por çfarë lidhje ka ndërmjet vezëve dhe Pashkës? Përse i lyejmë të kuqe? A është e rëndësishme kjo gjë? Dhënia e vezëve në kohën kur vjen pranvera është një zakon që praktikohej në shumë vende dhe jo vetëm nga të krishterët. Që prej kohëve të lashta veza ka qenë simboli i jetës. Veza e dhuruar në pranverë është një mënyrë në të cilën disa vende festojnë ardhjen e pranverës. Ndërsa praktika e krishterë për lyerjen e vezëve për ditën e pashkës ka një kuptim tjetër. Për shumë të krishterë thyerja e vezës në ditën e Pashkës simbolizon varrin nga i cili doli Jezusi. Shpesh ato lyhen me ngjyrë të kuqe për të përfaqësuar gjakun e Krishtit që u derdh në kryq. Disa të krishterë gjithashtu e shohin vezën e Pashkës si simbol të jetës së re që Jezus Krishti na jep. Vitet e fundit veza e kuqe është zëvendësuar me një vezë prej çokollate dhe në disa vende është si traditë që vezët të mos lyhen me një por me shumë ngjyra. Jo të gjithë të krishterët e ndjekin traditën e lyerjes së vezëve për Pashkë. Disa pasues të Jezus Krishtit e shohin traditën e vezës së Pashkës si të parëndësishme dhe që tërheq vëmendjen nga kuptimi i vërtetë i Pashkës. Ata theksojnë rëndësinë e besimit në Krishtin i cili shfaqet nëpërmjet bindjes ndaj fjalës së tij në krahasim me ndjekjen e riteve fetare. Është e vërtetë se njerëzit mund të ndjekin tradita fetare në mënyrë të verbër pa patur një besim të vërtetë. Duhet të pranohet gjithashtu se përdorimi i vezëve të Pashkës nuk është diçka që Perëndia e ka urdhëruar por një traditë e adoptuar nga kisha në vitet e mëvonëshme. Për këtë arsye nuk është një pjesë e domosdoshme e besimit të krishterë. Jezus Krishti na paralajmëroi për rrezikun që vjen kur i japim më shumë rëndësi traditave të njerëzve sesa ligjit të Perëndisë. Është mirë t’i bësh vetes këtë pyetje: A i besoj Jezus Krishtit? A besoj që ai vdiq për mëkatet e mia dhe se ai u ringjall përsëri? Nëse jo, atëherë vezët e Pashkës madje edhe festimi i Pashkës nuk do të ketë vlerë për ty. ID.