| Gazeta JEHONA |
||||
Dashuria e një zogu nënë Pasi një zjarr ra në një pjesë të parkut Yellowstone, një nga rojet gjeti trupin e djegur të një zogu në fund të një peme që po nxirrte tym. Kur e lëvizi atë me një shkop, tre zogj të vegjël dolën nga krahët e nënës së vdekur. Mbetjet e një foleje gjysmë të djegur flisnin për atë që kishte ndodhur. Kur flakët e pakontrollueshme e përfshinë pemën, foleja gjysmë e djegur ra në tokë dhe nëna u ul pranë saj në mënyrë që zogjtë e saj të vegjël mund të gjenin mbrojtje poshtë krahëve të saj. Kur flakët u ngritën rreth saj ajo dha jetën në mënyrë që fëmijët e saj të mund të jetonin. Ç’tregon pashka? Që Jezus Krishti vdiq për ne. A janë vendosur krahët e tij mbi jetën tënde? Çlirim nga detyrimi për të shkuar në luftë Gjatë luftës së Napoleonit kundër Anglisë, në ushtrinë franceze burrat rekrutoheshin me një sistem llotarie. Kur binte emri i dikujt ai duhej të shkonte në betejë. Por kishte një përjashtim: një njeri do të lirohej nga detyra nëse një tjetër ishte gati të zinte vendin e tij. Një herë ndodhi që njeri prej atyre që ishin zgjedhur nuk pranoi të shkoi duke thënë: ‘Unë u vrava dy vjet më parë’. Në fillim ata menduan se nuk ishte mirë nga ana mendore, por ai këmbëngulte se ishte e vërtetë. Ai pretendonte se regjistrat do të tregonin se ai ishte rekrutuar dy vjet më parë dhe se ishte vrarë në aksion. “Si mund të ndodhë një gjë e tillë përderisa ti je i gjallë tani?” pyetën ata. Ai shpjegoi se kur e thirrën, një shok i ngushtë tha: “Ti ke një familje të madhe kurse unë nuk jam i martuar dhe askush nuk ka nevojë për mua. Do të marr emrin dhe adresën tënde dhe do të shkoj në vendin tënd”. Dhe kështu ishte shkruar vërtet në regjistër. Ai nuk kishte pse të shkonte. Shoku i tij kishte vdekur në vendin e tij. Ç’tregon pashka? Se Krishti kështu veproi. Ai vdiq në kryq në vendin tonë. Treni dhe djali Xhoni ishte babai i një djali 8 vjeç. Ai e donte shumë djalin e tij. E kishte si dritën e syve të tij. I biri i tij ishte si gjithë fëmijët e tjerë i cili dëshironte vazhdimisht të shkonte dhe të punonte me babain e tij. Një ditë Xhoni vendosi ta merrte djalin e tij me vete në punë. Ai punonte si drejtues i një ure përmes lumit Misisipi. Xhoni kishte si detyrë të ngrinte dhe të ulte urën në mënyrë që anijet dhe trenat të mund të kalonin. Xhoni dhe djali i tij ishin duke ngrënë drekë kur ai kuptoi se Memphis Belle, një tren me 300 pasagjerë, po bëhej gati për të kaluar mbi urë, por ura nuk ishte ulur. Xhoni u ngjit shpejt nëpër shkallë, mbërtheu levën për të ulur urën dhe në atë çast kuptoi se i biri ishte ngjitur në urë dhe kishte rënë ndërmjet mekanizmave të urës. Xhoni dëgjonte trenin me 300 pasagjerë që po vinte. Me mendjen e tij filloi të mendonte se si mund të nxirrte të birin nga mekanizmat dhe në të njëjtën kohë të ulte urën, por e dinte se duhej të merrte një vendim. Xhoni e uli urën tamam në kohën kur treni duhej të kalonte duke e shtypur të birin ndërmjet mekanizmave. Xhoni e pa trenin tek kalonte dhe pa një burrë që lexonte gazetën, një grua që pinte çaj dhe një tjetër që fliste me gruan e tij. Ai bërtiti me sa kishte fuqi: “Hej, a nuk e dini se çfarë bëra për ju?” Ata nuk e dëgjuan prandaj thirri edhe njëherë “Hej, a nuk e dini se çfarë bëra për ju?” Por përsëri ata vazhdonin me jetët e tyre pa ditur se çfarë kishte bërë Xhoni për ta. Ç’tregon pashka? Duket sikur Perëndia na flet: “A nuk e dini se çfarë kam bërë për ju? Dërgova birin tim të vetëm në tokë për ju. Ai vdiq në mënyrë të tmerrshme në mënyrë që ju të shkoni në parajsë. Përse vazhdoni të jeni të zënë me jetët tuaja pa kuptim duke më shpërfillur?” Kryqi i Rembrantit Tre kryqet është një pikturë e famshme e Rembrantit. Ata, që e shohin, së pari përqendrohen te kryqi në qendër ku vdiq Krishti. Pastaj shohin turmën e mbledhur rreth kryqit. Atyre u bëjnë shumë përshtypje veprimet dhe shprehjet e ndryshme në fytyrë të njerëzve të përfshirë në krimin e tmerrshëm të kryqëzimit të Birit të Perëndisë. Në anë të pikturës është një figurë tjetër, pothuajse e fshehur në hije. Kritikët e artit thonë se kjo është një paraqitje e vetë Rembrantit, sepse ai e kuptoi që me mëkatet e tij edhe ai bëri që Jezusi të gozhdohej në kryq. |
||||
| Shëmbëlltyra për Pashkën |