Gazeta JEHONA
			Feja e shqiptarit është.... Ndaj pyetjes: “Cila është feja e Shqiptarit?” si përgjigjesh? Njëri përgjigjet ‘atë fe’, tjetri përgjigjet ‘këtë fe’, dikush tjetër thotë që shqiptari s’ka fe.  Një person tjetër thotë “feja e shqiptarit është paraja”.  Dëgjova një version të ri kohët e fundit: “Feja e shqiptarit është . . . . Amerika”! Përgjigja më e famshme Pa dyshim përgjigja më e famshme është ajo që nxori nga pena e tij Vaso Pasha në shekullin 19-të: “Feja e shqiptarit është shqiptaria”.   Fjala e Vaso Pashës është mjaft domëthënëse.  Por se ku qendron domëthënia e tij, këtu lind pak diskutim.  Po të besojmë propagandën që u përhap gati 50 vjet me pare nga Partia e Punes “Feja e shqiptarit është shqiptaria” do të thotë se popullit shqiptar nuk i duhet feja fare.  Këta e kthyen thënien e Vaso Pashës në një parullë kundër besimit në Perëndi.  Por a thua që ky ishte synimi i Vasos?  Që të zhvishte shqiptarët nga çdo besim fetar?  Sigurisht që jo! Vaso Pasha u bëri thirrje bashkëathdhetarëve për unitet dhe për patriotizëm në një kohë që kjo ishte e domosdoshme për mbijetesën kombëtare në prag të shpërbërjes së perandorisë turke. Por patriotizmi nuk e përjashton fenë.  Pjesa dërrmuese e patriotëve të mëdhenj që kanë dalë kanë qënë burra që kanë besuar te Perëndia.  Dhe dashuria për Perëndinë nuk e përjashton dashurinë për vendin tënd.  Përkundrazi, ai që e do Zotin, si mund të mos e dojë vendin dhe popullin e tij? Veçse besimi i tij të jetë drejtuar një perëndi i urrejtjës dhe jo ai i dashurisë. A është feja e shqiptarit ende shqiptaria?  A janë vlerat patriotike të dukshme në popullin shqiptar sot?   Te disa po.  Te disa të tjerë jo.  Dhe se si tingëllon kjo thënie e “shqiptarisë” kur del nga goja e njerëzve që duan vetëm të vjedhin vendin e tyre dhe jo ta pasurojnë atë. Feja e shqiptarit është . . . Ç’është kjo tendencë që kemi të jemi aq përgjithësues kur flasim për një popullsi disa milionëshe!  Kush është ai që është aq kompetent sa mund të shpallë që “gjithë shqiptarët janë kështu”, apo “gjithë shqiptarët janë ashtu”?  Larg nesh paragjykime të tilla të gabuara! Më të vërtetë, feja e shqiptarit eshte ajo çka zgjedh vetë çdo shqiptar.  Feja e shqiptarit janë ato vlera mbi të cilat çdo shqiptar ndërton jetën e tij.  Dikush ndërton mbi një themel të mirë, e dikush mbi një themel të dobët.  Por secili të ketë kujdes për veten e vet se mbi cilen bazë ai ndërton. Personalisht, unë kam përqafuar ato vlera që gjej në faqet e librit të parë që u shkrua ndonjëherë në shqip – Biblën e shenjtë.  Ky libër më tregon se ne jemi të krijuar dhe jo të gjendur këtu rastësisht.  Ky libër më tregon që secili prej nesh është një krijesë e vëcantë, e ndërgjegjshme dhe me një përgjegjësi për familjen dhe jetën e tij.  Dhe ky libër më mëson që të dua të mirën e vendit tim dhe të popullit tim.  Pa dyshim që ky libër më mëson të dua Perëndinë që më krijoi përmbi çdo gjë tjetër.  Gjithashtu, është ky libër që më mëson që unë jam i gabueshëm, që kam nevojë për korrigjimin e të tjerëve, dhe që kam nevojë për Perëndinë çdo ditë të jetës sime. Këto janë ato vlera që unë kam përqafuar.  Dhe a thua që ai njeriu që i shërben këto vlera, do t’i sjell të mira apo të këqija vendit të tij?  Mendohu për këtë.   Dhe pyet veten:  Cila është feja ime?  A jam unë në rrugën e duhur?  A po i bëj mirë vendit tim?  Uroj që përgjigja të jetë ajo e duhura.  Sidoqofë, feja e shqiptarit është ajo çka zgjedh vet.